ម៉ាឡេស៊ី៖ យុវតីដែលជាតំណាងបវរកញ្ញាកម្ពុជា ២រូបបានឈ្នះមកុដក្នុងការប្រកួតកម្មវិធីបវរកញ្ញា ២ផ្សេងគ្នាគឺ Little Miss Global 2023 និង Miss Teen Global 2023 នៅក្នុងប្រទេសម៉ាឡេស៊ី នាថ្ងៃទី៤ ខែកុម្ភៈ ឆ្នាំ២០២៣។

យុវតី ឆដា មុន្នីនាថ អាយុ ១២ឆ្នាំ បានឈ្នះមកុដបវរកញ្ញា Little Miss Global 2023 ខណៈនាពេលប្រកួតឈុតតំណាងជាតិក្នុងកម្មវីធីប្រកួតនេះ បវរកញ្ញាកម្ពុជាក៏បានឈ្នះឈុតតំណាងជាតិល្អជាងគេផងដែរ ដោយបានគ្រងឈុត ឧទ្ទិសវារី បទ្មមុខី បទីបសិរី ដែលតំណាងឱ្យការឧទ្ទិស ឬការដឹងគុណដល់ព្រះគង្គារ ឬព្រះម៉ែគង្គា ទេវីដែលមានព្រះភ័ក្រ្កស្រស់ដូចផ្កាឈូក កាន់ប្រទីបដែលនាំមកសិរីសួស្ដី ឬភាពសុខសាន្ត។

ដោយឡែកយុវតី គង់ ច័ន្ទណារីយ៉ា ក្នុងវ័យ ១៣ឆ្នាំ បានឈ្នះមកុដ Miss Teen Global 2023 ព្រមទាំងឆ្លើយសំណួរក្នុងវគ្គសំណួរ-ចម្លើយ បានយ៉ាងល្អដោយភាពជឿជាក់។ ជាមូយគ្នានានេះ បវរកញ្ញារូបនេះក៏បានឈ្នះក្នុងវគ្គឈុតតំណាងជាតិដូចគ្នា ដោយបានគ្រងឈុត សន្តិអប្សររង្សី មានន័យថា កុលស្ត្រីនៃសន្តិភាព។

ក្នុងកម្មវិធីប្រកួតបវរកញ្ញាទាំង២កម្មវិធីនេះ បវរកញ្ញាកម្ពុជាទាំង២រូបបានខំប្រឹងប្រែងបញ្ចេញសមត្ថភាពប្រកួតបានយ៉ាងល្អ ដោយអាចទាក់ទាញចំណាប់អារម្មណ៍ពីគណៈកម្មការរហូតអាចឈ្នះគ្រងមកុដទាំង២រូបតែម្តង បើទោះជាឋិតក្នុងវ័យក្មេងពិតមែនក៏បវរកញ្ញាទាំង២រូបនៅតែមានឆន្ទៈក្លាហានក្នុងការប្រកួតលំដាប់អន្តរជាតិនេះ។

ជ័យជម្នះជាបន្ទាប់នៃវិស័យបវរកញ្ញារបស់កម្ពុជានេះ បានធ្វើឱ្យសន្ទុះការគាំទ្រកើនឡើងការប្រកួតបវរកញ្ញា និងទទួលបានការចាប់អារម្មណ៍ពីមហាជនជាច្រើន មិនថាជាតិនិងអន្តរជាតិ ក៏ជាមោទនភាពមួយសម្រាប់ជាតិ ដែលមានបេក្ខភាពជាយុវតីខ្មែរក្លាហាន មានសមត្ថភាពប្រកួតកម្រិតអន្តរជាតិច្រើនវិញ្ញាសារមិនត្រឹមតែជាការប្រកួតសម្រស់នោះទេ។

គួរឱ្យដឹងដែរថា Miss Teen Global 2023 បវរកញ្ញាកម្ពុជា គង់ ចន្ទ័ណារីយ៉ា បានឈ្នះមកុដ ខណៈឡាវ និងថៃ ជាប់លំដាប់លេខ២ និងលេខ៣ និងហ្វីលីពីន បានលំដាប់លេខ៤ ចំណែកលំដាប់លេខ៥ បានទៅលើឥណ្ឌូនេស៊ី ដោយឡែកសម្រាប់មកុដបវរកញ្ញាឯក Little Miss Global 2023 បានទៅលើបវរកញ្ញាកម្ពុជា ឆដា មុន្នីនាថ ខណៈថៃ និងម៉ាឡេស៊ីបានលំដាប់លេខ២និងលេខ៣ និងលេខ៤ បានលើ Botswana និងលេខ៥ បានទៅប្រទេសឥណ្ឌូនេស៊ី៕